مكملش دراسته بالحقوق وملياردير| مفيدة شيحة تضرب بشخصية شهيرة المثل لطلاب ثانوية عامة

وجهت الإعلامية مفيدة شيحة، عدة نصائح لطلاب الثانوية العامة بعد ظهور نتيجة الثانوية العامة، مؤكدة أن المجموعة ليس كل شيء.

وأضافت مفيدة شيحة، في برنامجها الستات، المذاع عبر قناة النهار وان، مساء اليوم السبت، أن :"عندنا كمان بيل جيتس مكملش دارسته فى الحقوق بجامعة هارفارد لانه مكنش حاببها وسابها، واتجه لعالم الحاسوب وبرمجيات الكمبيوتر، اللي خلت منه واحد من أكبر مليارديرات العالم، والطريف انه بعد 30 سنة رجع تاني عشان يكمل دراسته بالكلية وهو مؤسس مايكروسوفت أشهر وأكبر شركة فى العالم لبرمجيات الكمبيوتر".

وتابعت مفيدة شيحة، أن :"عشان بس الكلام ميكونش تنظير بس، وزير التربية والتعليم نفسه اتكلم في قصة المجاميع دي، وقال ان المجاميع المبالغ فيها في نتيجة الثانوية العامة كانت موجودة في نظام امتحانات الثانوية العامة القديم اللي كان يعتمد على الحفظ والتلقين". وأكملت مقدمة برنامج الستات، أن '" كمان عايزه أقولكم ان الحمد لله في بعض الناس ابتدت تعرف وتفهم ان الثانوية مش هي كل شيء، وبقى في توجه للطلاب انهم بعد الاعدادية يخشوا المدارس التكنولوجية، اللي هي المستقبل دلوقتي ووظائفها الشركات الكبرى بتدور على اللي دارسين فيها".

وأنهت مفيدة شيحة، أن '" الخلاصة متوقفش حياتك على رقم ومجموع، وخلي التركيز اكتر على حلمك وعايز تبقى ايه.. ودايما حط بدايل، وزي ما قولنالكم على بعض الامثلة في العمل الجاد والاعتراف بعلمهم وانجازاتهم عالميًا، منهم اللي حصل على مجموع مش عالي بالثانوية العامة، ومنهم اللي دخل بما يسمى بكليات القمة ولكنه تميز في مجال آخر".