محمد الغيطي عن انتقادات مسلسل الضاحك الباكي: طلعت روحنا في تحضيراته سنتين.. و7 منتجين رفضوه

علق المؤلف محمد الغيطي، على الانتقادات الموجهة لمسلسله الجديد الذي يحمل اسم الضاحك الباكي، الذي تناول سيرة الفنان الراحل نجيب الريحاني، من إخراج محمد فاضل.

وقال محمد الغيطي في تصريحات تلفزيونية: المخرج محمد فاضل ده تاريخ، ولما بروح دولة عربية بقول إحنا زعيمنا في الإخراج محمد فاضل وفي التمثيل زعيمنا عادل إمام، دع عمدة الإخراج، واحد داخل على 90 سنة، وواحد ييجي يتبول على السوشيال ميديا ويقول عليه كُهنة وحطوه في متحف؟.. محمد فاضل أحطه في متحف؟.. هموت العظام بتوعي وقوتي الناعمة؟

وأضاف محمد الغيطي: في بلاد برة بيحترموا الكبير، وعلى رأي أحمد زويل إحنا بننجح إننا نفشل الناجح، في الغرب بينجحوا الفاشل، إحنا طلع روحنا في تحضيرات المسلسل سنتين وقعد عندي 10 سنين في الدرج و7 منتجين رفضوه، مش قادرين ينتجوه، وييجي شوية عيال على السوشيال ميديا يشككوا في الكتابة، ويقولوا بطرس غالي مات في حنطور ولا عربية؟ لا أنا مراجعه كويس، واعرفوا إنكم بتتكلموا مع أساتذة يعني تبلع ريقك وأنت بتتكلم، وحيد حامد وأسامة أنور عكاشة لو كانوا عايشين دلوقتي كانوا بطلوا واعتزلوا بسبب العيال اللي على السوشيال ميديا.

أبطال مسلسل الضاحك الباكي

ويضم مسلسل الضاحك الباكي العديد من الفنانين، منهم: عمرو عبد الجليل، رزان مغربي، محمد سليمان، فردوس عبد الحميد، مصطفى شوقي، هاجر الشرنوبي، محمد صلاح آدم، أحمد السلكاوي، عبد الله عبد الغني، هاني شو، والمسلسل تأليف محمد الغيطي، وتحت قيادة المخرج محمد فاضل.