سمية الخشاب تنصح الشباب في عيد الحب: ”اتجوزوا مطلقات لأنهم أكتر خبرة”

استعادت الفنانة سمية الخشاب نشاطها في التفاعل مع جمهورها بمناسبة الاحتفال بعيد الحب أمس الثلاثاء 14 فبراير، وأطلقت عدة نصائح خاصة للفتيات والرجال، مشيرة إلى أنها لا تعترف بيوم الحب، وطلبت من كل فتاة الاهتمام بنفسها أولاً، وتربية القطط لطرد الطاقة السلبية، كما نصحت بالزواج من المطلقات لأنهن "أكثر خبرة".

سمية الخشاب وجهت نصيحة لجمهورها في يوم الحب، عبر حسابها الشخصي بموقع تويتر، قائلة: اتجوز وأنت عندك 40 سنة عشان تكون عملت فلوس كويسة وتعيش أولادك بمستوى كويس، هتتجوز بدري هتخلف 4 أو 3 ويطلعوا صايعين ويبقوا عالة على المجتمع.

وأضافت سمية الخشاب: لو اتجوزت الست المطلقة هتلاقيها أكثر خبرة في الحياة، لو اتجوزت وأنت عندك 25 سنة وريني هتصرف على مراتك وعيالك إزاي.

وانتقلت سمية الخشاب لتقديم لنصائح للفتيات والسيدات عبر مداخلة هاتفية ببرنامج الستات الذي تقدمه الإعلامية سهير جودة، وقالت: أنا عقلانية رومانسية وعقلي بيشتغل في الوقت المناسب، ولما أحس أن عقلي لازم يتدخل بخليه يتدخل وبصدقه وبضرب له تعظيم سلام، والحمد لله عقلي تدخل كتير علشان كده أنا لسه باقية على قيد الحياة، وده بعد النضج والخبرات لأني ما كنتش كده.

وأضافت سمية الخشاب: أنا برج الميزان وهما عطائيين أوي ونحانيح في الحب ويموتوا في الرومانسية، اللي بيعرف برج الميزان عارف أنه عطاء جداً وبيتفنن علشان يسعد حبيبه على حساب نفسه، لكن لما تيجي تحس أنه مش بيبادل بتقلب وتبقى وحشة، وأنا عقلي بيدخل في الوقت الصح وبقول لنفسي لازم تفوقي.

وأكدت سمية الخشاب أنها لا تعترف بيوم الحب قائلة: مش بعترف بيوم الحب وأنه يكون فيه يوم معين للحب، لأن اللي بيحب حد بيحبه طول الوقت ويهتم به طول الوقت ولما يلاقي حاجة حلوة يشتريها له ووقتها الهدية هيبقى ليها طعم أحلى كتير لأن الستات بيحبوا الهدايا.

وأشارت سمية الخشاب إلى أن الحب لا يقتصر على الرجل والمرأة فقط، قائلة: الحب مش حب للراجل والست فقط، ولكن تحبي نفسك وتتمني كل حاجة حلوة في حياتك وتشكري ربنا طول الوقت، ومش لازم نعلق سعادتنا وفرحتنا على حد في حياتنا، ولكن تقدري تسعدي نفسك وتتمني ليها، ده اللي بقول له لكل الناس لأن مفيش حاجة اسمها وحدة.

تابعت سمية الخشاب: ولو هجيب هدية لنفسي هتبقى بيجامة عشان الجو البرد، أو برفيوم، أو أي حاجة نقصاني هتخليني فرحانة ومبسوطة، إيه المشكلة يعني، الحياة بسيطة أوي، متوقفوش سعادتكم على حد، حبي نفسك وهادي نفسك، وانبسطي.

ووجهت سمية الخشاب نصيحة للسيدات قائلة: ما توقفوش سعادتكم على حد، حبي نفسك وادلعي وانبسطي، لما تعرفي باس وورد جوزك مش هيفيد بحاجة، لو عاوز يعمل حاجة هيعملها، ليه بتشغلي نفسك الحب مش بيجي كده، أنتِ كده بتضيعي طاقتك وتتعسي نفسك ويجي لك سكر وضغط وتتخني، اتفرجي على فيلم جميل، اعملي ماسك اهتمي بجمالك وحالتك النفسية، وأخرجي ما تستنيش واحدة صاحبتك واشتري حاجات واخترعي حاجات تبسط اعملي طابخة حلوة، أنا بحب نفسي وادلعها وممتنة لربنا، وبعمل ماسكات.