شم النسيم والفسيخ.. معلومات لازم تعرفها قبل ما تاكله

شم النسيم والفسيخ.. طبعًا أكلة الفسيخ مقدسة عند المصريين بيستنوها من السنة للسنة.. وفي ناس بتحبه لدرجة إنها بتاكله دايمًا مش كل شم نسيم وبس.

واستعدادًا للاحتفال بشم النسيم.. هنقولكم على على نصائح تخلينا نستمتع بأكلة الفسيخ من غير ما نشيل هم وجع وانتفاخ بطننا بعد مناكله.

أول حاجه بنأكد على ضرورة غسل الفسيخ بالخل والليمون علشان نقلل نسبة الملوحة، مناكلش كميات كبيرة ونضيف الأطباق اللي بتساعد على الهضم زي الخس والخيار والبقدونس، كمان الكانتلوب والموز والبرتقال من الحاجات المهمة اللي بتساهم في إخراج الملح الزائد من الجسم.

ممكن نشرب الأعشاب لتطهير المعدة زي الشاي الأخضر مع النعاع أو القرفة أو الزعتر.

وطبعًا لازم تعرف أن في ناس ممنوع عنهم أكل الفسيخ:

- مريض الضغط.

- مريض الكُلى .

- مريض الكبد .

- السيدة الحامل .

- الأم المُرضعة .

- الأطفال أقل من ٣ سنوات .

وبنقدملك نصائح عند شراء وتجهيز الفسيخ:

- اشتري من مكان مضمون .

- الفسيخ مينفعش يبقى في صفيحة ولازم يبقى في براميل من الخشب.

- الفسيخ لازم يكون متماسك مش طري زيادة عن اللزوم.

- اغسل الفسيخ بخل وليمون قبل الأكل وبعدها بالماء الجاري.

- تخلص من كل الأحشاء الداخلية للفسيخة.

- من الأفضل تسخين الفسيخ على نار هادئة قبل الأكل.

ونصائح بعد أكل الفسيخ:

- اشرب كمية كبيرة من المياه.

- كُل موز أو بطيخ أوكوباية زبادي بعد الأكل مباشرة.

- اشرب كوباية ليمون أو شاي أخضر بالليمون بعد الأكل .

- قوم اتمشى بعد الأكل ع الأقل لمدة نصف ساعة.

- خلي بالك لو حسيت بأي عرض من أعراض التسمم الغذائي بعد أكل الفسيخ توجه فورًا لأقرب مستشفى.