(يا واقفه صامده وسط النار)

(يا واقفه صامده وسط النار)

أنا مكمل مع سبعك

مع إللي طبعه من طبعك

مع إللي كفه شال الروح

وجاب فرحك وشال دمعك

**

أنا نيلك ومواويلك

أنا عودك بغنيلك

يا ريحة بلدي متسافريش

أنا إللي هجري وأجيلك

**

أنا في الشده متراسك

وأنا في الفرح ونّاسك

وأنا أهلك وأنا ناسك

وأنا الجندي وأنا الناسك

**

أنا زرعك وأنا قلعك

وأنا عينك وأنا سمعك

أنا في الشمس ضليلتك

وأنا في الضلمه دي شمعك

***

يا واقفه صامده وسط النار

حبيبك في هواكي إحتار

تزول الدنيا حواليكي

وجيشك ع الحدود زنهار

**

ونكمل بكره يا بلادي

سيد فهيم